Vetëm në ditën e parë shiten afro gjysma e biletave

Në takimin e së shtunës me Suedinë, stadiumi kombëtar "Qemal Stafa" pritet të jetë i mbushur në 80 për qind të kapacitetit të tij. Për të mbështetur Shqipërinë në sfidën e parë eliminatore të Botërorit 2010 kundër Ibrahimoviç & Co. shitja e biletave vazhdon me rritje mesatare dhe parashikohet që sportelet të jenë të hapura edhe në paraditen e ndeshjes. Për të siguruar një vend në stadium, në ditën e parë është regjistruar një "bum" i vërtetë, ku janë shitur afro 40 për qind e biletave. Preferenca kryesore e mbështetësve ka qenë tribuna qendrore, madje dje ka qenë shumë e vështirë që të sigurohej një biletë. Kjo, edhe për faktin se një pjesë e konsiderueshme ka shkuar në favor të sponsorëve të Kombëtares, por edhe të institucioneve. Vende të "lakmuara" vazhdojnë të jenë edhe ato në tribunën karshi "D2". Ndërkohë që pritet një numër i madh tifozësh edhe në tribunat "D1" dhe "D3".